ممبئی میں اب کار خریدنا ہوجائے گامشکل

ممبئی: اگر سب کچھ ٹھیک رہا تو ریاست کے تمام بڑے شہروں کے ساتھ ملک کی مالیاتی راجدھانی ممبئی میں کار خریدنا مشکل ہو جائے گا۔ مہاراشٹر حکومت ‘’نو پارکنگ-نو کار‘ پالیسی پر کام کر رہی ہے۔ اگر ایسا ہوتا ہے تو ممبئی اور دوسرے بڑے شہروں میں گاڑی رکھنے کا خواب دیکھنے والوں کو پہلے پارکنگ کا انتظام کرنا پڑے گا۔ مہاراشٹر کے وزیر ٹرانسپورٹ پرتاپ سرنائک نے کہا ہے کہ اس کا مقصد شہروں میں بھیڑ اور غیر قانونی پارکنگ کو روکنا ہے۔

ریاستی ٹرانسپورٹ کے وزیر پرتاپ سرنائک نے اعلان کیا ہے کہ خریدار کے نام پر کوئی نئی گاڑی رجسٹر نہیں کی جائے گی جب تک کہ وہ متعلقہ میونسپل باڈی کو پارکنگ کی جگہ کا سرٹیفکیٹ پیش نہیں کرتا ہے۔ وزیر ٹرانسپورٹ نے کہا کہ یہ فیصلہ بنیادی طور پر ممبئی میٹروپولیٹن ریجن میں پارکنگ کے بڑھتے ہوئے بحران سے نمٹنے کے لیے لیا گیا ہے۔ یہ اعلان ریاست کی نئی پارکنگ پالیسی پر ایک اعلیٰ سطحی میٹنگ کے بعد سامنے آیا ہے۔ میٹنگ کے بعد وزیر سرنائک نے کہا کہ ہم پارکنگ کی جگہ بنانے پر غور کر رہے ہیں۔ ترقیاتی اصولوں پر عمل کیا جانا چاہیے اور ڈیولپرز کو فلیٹس کے ساتھ پارکنگ کی جگہ بھی فراہم کرنی چاہیے۔ سرنائک نے کہا کہ اب اگر نئے خریداروں کے پاس میونسپل باڈی سے پارکنگ الاٹمنٹ سرٹیفکیٹ نہیں ہے تو ان کے نام پر نئی گاڑیاں رجسٹر نہیں ہوں گی۔

وزیر ٹرانسپورٹ نے کہا کہ ایم ایم آر میں پارکنگ کی کمی ہے۔ انہوں نے کہا کہ نامزد میدانوں کے نیچے پارکنگ کی سہولت کی تعمیر کی اجازت دینے کے لیے ایک تجویز پر کام کیا جا رہا ہے۔ توقع ہے کہ اس اقدام سے شہر کی ہریالی کو متاثر کیے بغیر پارکنگ کی مزید جگہیں بنانے میں مدد ملے گی۔ سرنائک نے شہری نقل و حرکت کو بہتر بنانے کی کوششوں کے ایک حصے کے طور پر پوڈ ٹیکسی سسٹم متعارف کرانے کے مہاراشٹر کے منصوبوں کے بارے میں بھی بات کی۔