بہار انتخابات سے قبل محکمہ صحت میں 41ہزاراسامیوں کی بھرتی

 پٹنہ: ریاست کے ہر شہری کو صحت کی بہتر سہولیات فراہم کرنا حکومت کی اولین ترجیح ہے۔ اس کے پیش نظر ہفتہ کے روز 288 ماہر ڈاکٹروں کو تقرری خط دیے گئے۔اس کے علاوہ 722 جنرل فزیشنز کی تقرری کا عمل آئندہ 15 دنوں میں مکمل کر لیا جائے گا۔ اس کے علاوہ محکمہ کی مختلف آسامیوں پر 41 ہزار تقرریاں ہونے جا رہی ہیں۔ یہ باتیں ریاستی وزیر صحت منگل پانڈے نے راجدھانی کے کنونشن بھون میں منعقدہ ایک تقریب میں کہیں۔

یہ پروگرام ماہر ڈاکٹروں کو تقرری کے خطوط فراہم کرنے کے لیے منعقد کیا گیا تھا۔ اس موقع پر وزیر موصوف نے کہا کہ ریاست میں 8500 ڈاکٹروں کی بحالی کا عمل جاری ہے، جو اگلے تین ماہ میں مکمل ہو جائے گا۔ان کی تقرری کے بعد ریاست کی صحت کی سہولت میں کافی بہتری آئے گی۔ انہوں نے کہا کہ اس کے لیے محکمہ کی جانب سے مختلف آسامیوں پر 41 ہزارتقرریاں ہونے جا رہی ہیں۔ اس کے لیے اشتہار جاری کر دیا گیا ہے۔وزیر نے کہا کہ ہیلتھ ورکرز کی تقرری کے بعد اسپتالوں میں جانچ کی سہولیات کو بہتر بنانے میں بہت مدد ملے گی۔ محکمہ صحت کی جانب سے مریضوں کے مناسب ٹیسٹ اور بہتر علاج کو یقینی بنانے کے لیے ہر ممکن اقدامات کیے جا رہے ہیں۔

وزیر نے کہا کہ پچھلے پانچ دنوں میں ریاست میں 17 لاکھ سے زیادہ لوگوں کے لئے آیوشمان کارڈ بنائے گئے ہیں۔ اب تک ریاست میں 3 کروڑ 96 لاکھ لوگوں کو آیوشمان کارڈ جاری کیے جا چکے ہیں۔ امید ہے کہ جلد ہی یہ تعداد 4 کروڑ سے تجاوز کر جائے گی۔ اس اسکیم کے تحت ریاست کے ایک کروڑ 79 لاکھ خاندانوں کو آیوشمان کارڈ فراہم کیے جانے ہیں۔

اسپیشلسٹ ڈاکٹروں کو اپوائنٹمنٹ لیٹر کے ساتھ لیپ ٹاپ بھی فراہم کیا گیا۔ اس کا بنیادی مقصد یہ ہے کہ ڈاکٹروں کو ڈیجیٹل سہولیات سے آراستہ کیا جائے اور وہ مریضوں کو بہتر سہولیات فراہم کر سکیں۔