حضرت سیدنا مفضل سیف الدین کی بصیرت کے تحت قرآنی تلاوت کو ڈیجیٹل پلیٹ فارمز کے ذریعے عالمی سطح پر فروغ دینے کی کوشش

ممبئی: دعوتی بوہرہ برادری نے قرآن کریم کے علوم تک رسائی کو وسیع بنانے کے لیے ایک نیا آن لائن اقدام شروع کیا ہے۔ نئے قائم کیے گئے ’صوت القرآن الکریم‘ یوٹیوب چینل پر مکمل قرآن کریم کی تلاوت، حضرت سیدنا مفضل سیف الدین کے صاحبزادے، شہزادہ حسین برہان الدین کی آواز میں پیش کی جا رہی ہے۔ یہ منصوبہ معہد الزہراء کی کاوشوں کا حصہ ہے، جو قرآن کریم کی تعلیم، حفظ اور تلاوت کے لیے ایک اہم ادارہ ہے۔

یہ چینل قرآن کریم کی مکمل تلاوت کو روایتِ ’خلف عن حمزہ‘ کے مطابق پیش کرتا ہے، جو قرآنی قراءت کی دس مستند روایات میں سے ایک ہے اور صدیوں سے مسلسل علمی سلسلے کے ذریعے محفوظ رہی ہے۔ اپنی دقیق ادائیگی اور منفرد صوتی خصوصیات کے باعث یہ روایت کم ہی مکمل ڈیجیٹل صورت میں دستیاب رہی ہے۔ اس کی آن لائن اشاعت طلبۂ قرآن کے لیے ایک نادر موقع فراہم کرتی ہے کہ وہ اس روایت کو مکمل طور پر سن سکیں اور اس کا مطالعہ کر سکیں۔  معہد الزہراء دعوتی بوہرہ برادری میں قرآنی تعلیم کی رہنمائی کرتا ہے۔ اس ادارے کی بنیاد 1976 میں مرحوم سیدنا محمد برہان الدین نے رکھی تھی تاکہ قرآن کے حفظ اور تلاوت میں اعلیٰ معیار کو فروغ دیا جا سکے۔ 1998 سے شہزادہ حسین برہان الدین اس ادارے کی سرپرستی کر رہے ہیں، جہاں طلبہ کو تلاوت اور حفظ کے علوم میں تربیت دی جاتی ہے اور اعلیٰ علمی معیار کو برقرار رکھا جاتا ہے۔

بطور نگرانِ جامعہ سیفیہ، جو برادری کا ممتاز تعلیمی ادارہ ہے، شہزادہ حسین برہان الدین خود حفاظ کے امتحانات کی نگرانی کرتے ہیں تاکہ قرآن کریم کے حفظ میں درستگی اور مہارت کو یقینی بنایا جا سکے۔ ایک ممتاز قاری ہونے کے ساتھ ساتھ وہ قاہرہ میں قائم نقابت قراء القرآن الکریم کے اعزازی رکن بھی ہیں، جو دنیا کی معتبر ترین قراء کی تنظیموں میں شمار ہوتی ہے۔

قرآنی قراءت کے میدان میں ان کی علمی خدمات میں تین جلدوں پر مشتمل کتاب ’قراءت ظاہرہ لکتاب اللہ‘ شامل ہے، جس میں قرآنی قراءت کے اصولوں کو جدولوں اور بصری رہنمائی کے ذریعے پیش کیا گیا ہے۔ اس کتاب کے ہر صفحے پرکیوآر کوڈز شامل ہیں، جن کے ذریعے قاری براہ راست ان کی آواز میں قراءتِ عشر (قرآن کی دس معروف قراءتوں) کو سن سکتے ہیں۔ اس تصنیف کو جامعہ الازہر سے سندِ توثیق بھی حاصل ہے، جو قرآنی علوم کی تعلیم اور اشاعت میں عالمی سطح پر ایک مستند ادارہ ہے۔

’صوت القرآن الکریم‘ چینل کا آغاز حضرت سیدنا مفضل سیف الدین کے اس وژن کی عکاسی کرتا ہے جس کا مقصد ہر نسل میں قرآن سے تعلق کو مضبوط کرنا ہے۔ انہوں نے ہمیشہ برادری کے افراد کو اس بات کی ترغیب دی ہے کہ وہ اپنے گھروں میں قرآن کی تعلیم کو فروغ دیں، اور ان کی خواہش ہے کہ ہر گھر میں کم از کم ایک حافظ ہو اور پوری دنیا میں ایک لاکھ حفاظ تیار کیے جائیں۔

ڈیجیٹل پلیٹ فارمز کے ذریعے مستند قرآنی تلاوت پیش کر کے یہ اقدام دنیا بھر کے طلبہ اور سامعین تک رسائی فراہم کرتا ہے۔ اب خاندان، علماء اور طلبہ دنیا کے کسی بھی حصے میں رہتے ہوئے ان تلاوتوں کو سن اور سیکھ سکتے ہیں، جس سے ان کا قرآن سے روزمرہ تعلق مزید مضبوط ہوگا۔ معہد الزہراء کے سینئر رکن مرتضیٰ جعفر نے اس اقدام کو وسیع تر سامعین تک قرآنی علوم پہنچانے کی ایک اہم پیش رفت قرار دیا۔

انہوں نے کہا’اس چینل کا آغاز ہمارے اس مشن میں ایک اہم سنگِ میل ہے جس کے تحت ہم قرآن کے مقدس علوم کو محفوظ اور عام کرنا چاہتے ہیں۔ روایتِ خلف عن حمزہ کے مطابق مکمل قرآن کی اشاعت کے ذریعے ہم دنیا بھر کے طلبہ اور سامعین کو ایک ایسی قراءت تک رسائی فراہم کر رہے ہیں جو انتہائی باریک بینی اور مہارت کی متقاضی ہے۔‘

انہوں نے مزید کہا کہ یہ منصوبہ مزید وسعت اختیار کرے گا’ ہم مستقبل میں دیگر مستند قراءتوں کی ریکارڈنگ بھی شامل کرنے کا ارادہ رکھتے ہیں۔ حفص عن عاصم، ورش عن نافع اور السوسی عن ابی عمرو کی روایات پر کام پہلے ہی شروع ہو چکا ہے۔ ہماری امید ہے کہ یہ وسائل آنے والی نسلوں کے لیے مفید ثابت ہوں گے۔‘

’صوت القرآن الکریم‘ یوٹیوب چینل اب آن لائن دستیاب ہے جہاں سامعین مکمل تلاوت تک براہ راست رسائی حاصل کر سکتے ہیں۔

https://www.youtube.com/@SawtalQuranalKarim