لاڈلی بہن اسکیم بنی حکومت کے گلے کی ہڈی

ممبئی: وزیر اعلیٰ لاڈکی بہن یوجنا حکومت کے لیے گلے کی ہڈی بن گئی ہے ۔ محکمہ خزانہ نے قبائلی ترقی کے محکمے اور سماجی انصاف کے محکمے کے فنڈز کو ایس سی اور نو بدھسٹ کمیونٹیز کے لیے منتقل کر دیا ہے تاکہ لاڈلی بہنوں کو رقم دی جا سکے۔ محکمہ خزانہ کے مطابق دیگر محکموں کے فنڈز کو ڈائیورٹ کیے بغیر لاڈلی بہنوں کو رقم دینا ممکن نہیں۔

غور طلب ہے کہ اسمبلی انتخابات سے پہلے مہایوتی حکومت نے وزیر اعلیٰ لاڈکی بہن یوجنا شروع کی تھی۔ پھر حکومت نے لاڈلی بہنوں کو ماہانہ 1500 روپے دینے کا فیصلہ کیا۔ حکومت نے انتخابی مہم کے دوران اس رقم کو بڑھا کر 2100 کرنے کا وعدہ کیا تھا۔ لاڈلی بہنیں اپریل کی قسط کا انتظار کر رہی ہیں۔ ریاست کی خواتین اور بچوں کی ترقی کی وزیر ادیتی تٹکرے نے سوشل میڈیا ایکس پر لکھا کہ اہل استفادہ کنندگان بہنوں کے آدھار لنک بینک کھاتوں میں اپریل کی قسط جمع کرنے کا عمل جمعہ سے شروع ہوچکا ہے۔ یہ عمل اگلے 2 سے 3 دنوں میں مکمل ہو جائے گا اور تمام اہل استفادہ کنندگان کو براہ راست ان کے کھاتوں میں رقومات مل جائیں گی۔ عام طور پر ماہ کے آخری ہفتے میں لاڈلی بہن یوجنا کے مستحق خواتین کے کھاتوں میں قسط کی ادائیگی کی جاتی ہے، لیکن اپریل کے مہینے کی قسط میں تاخیر ہوئی۔ پہلے کہا گیا تھا کہ قسط اکشے ترتیہ پر ادا کی جائے گی، لیکن ایسا نہیں ہو سکا۔

تقریباً 2 کروڑ 34 خواتین لاڈکی بہن یوجنا سے مستفید ہیں۔ ماہانہ قسط کئی سرکاری اسکیموں کو متاثر کررہی ہے۔ حالیہ بجٹ اجلاس میں قبائلی محکمہ کے فنڈ میں 4000 کروڑ روپے اور سماجی انصاف کے محکمے کے فنڈ میں 3000 کروڑ روپے کی کٹوتی کی گئی۔ سماجی انصاف کے وزیر سنجے شرساٹ نے اس پر کھل کر ناراضگی ظاہر کی تھی۔ اب ریاستی حکومت نے قبائلی ترقی کے محکمے اور سماجی انصاف کے محکمے کو دیے گئے فنڈز کو خواتین اور بچوں کی ترقی کے محکمے کو لاڈکی بہن یوجنا کے لیے موڑ دیا ہے۔ قبائلی محکمہ کے 335.70 کروڑ روپے اور سماجی انصاف کے محکمے کے 410.30 کروڑ روپے خواتین اور بچوں کی ترقی کے محکمے کو بھیجے گئے ہیں۔ ریاستی حکومت کے فیصلے سے یہ واضح ہو گیا ہے کہ قبائلیوں، درج فہرست ذاتوں اور نو بدھ برادریوں کے لیے بہت سی اسکیموں میں کٹوتی کرنی پڑے گی۔

مہاراشٹر میں لاڈکی بہن یوجنا کے سربراہ نائب وزیر اعلیٰ ایکناتھ شندے نے کہا ہے کہ مہاراشٹر میں لاڈکی بہن یوجنا کبھی بند نہیں ہوگی۔ شندے نے یہ بات ایک ایسے وقت میں کہی جب ادھو سینا کے بہت سے عہدیدار اور کارکن نئی ممبئی سے ادھو ٹھاکرے کی قیادت والی پارٹی ان کی پارٹی شیوسینا میں شامل ہو رہے تھے۔ اس کی قیادت ادھو سینا کے عہدیدار رتن مانڈوی نے کی۔ اس موقع پر ڈی سی ایم شندے نے کہا کہ ‘لوگ شیو سینا میں شامل ہو رہے ہیں کیونکہ وہ ترقی چاہتے ہیں۔’ فلاحی اسکیموں پر تشویش پر شندے نے کہا کہ لاڈکی بہن اسکیم کو کبھی نہیں روکا جائے گا۔ انہوں نے اپوزیشن پر افواہیں پھیلانے کا الزام لگایا اور شہریوں پر زور دیا کہ وہ غلط معلومات پر یقین نہ کریں۔ شیوسینا کے سربراہ نے اپنی پارٹی کے انتخابی منشور کو مکمل طور پر نافذ کرنے کا وعدہ کیا۔ انہوں نے کہا کہ ہم پرنٹنگ کی غلطیوں جیسا بہانہ نہیں بنائیں گے۔ میں جو یقین دلاتا ہوں وہ ہوگا اور جو ممکن نہیں وہ نہیں ہوگا۔