ممبئی انٹرنیشنل ایئرپورٹ کے قریب نظرآیامشکوک ڈرون

ممبئی: ہند-پاک کشیدگی کے درمیان ممبئی کے ساکی ناکہ میں ایک نامعلوم ڈرون دیکھا گیا۔ اس ڈرون کو ایئرپورٹ کے قریب منڈلاتے ہوئے دیکھتے ہی سیکورٹی ایجنسیاں چوکس ہوگئی ہیں۔ ڈرون نظر آنے کی اطلاع ملتے ہی سیکورٹی ادارے فوری طور پر حرکت میں آگئے۔ پولیس ڈرون کی تلاش کر رہی ہے۔ سہار ایئرپورٹ نے ممبئی پولیس کے کنٹرول روم کو اس کی اطلاع دی تھی۔ اس کے بعد پولیس نے علاقے کی تلاش شروع کردی ہے لیکن خبرلکھے جانے تک پولیس کو کوئی مشکوک چیز نہیں ملی ہے۔

حضرت جیب جلال (گیبن شاہ درگاہ) مسجد ممبئی کے ساکی ناکہ پولیس اسٹیشن کے قریب واقع ہے۔ وہاں موجود ایک پرائیویٹ سیکورٹی گارڈ نے ڈرون دیکھنے کی اطلاع دی۔ انہوں نے بتایا کہ کچھ دیر بعد ڈرون قریبی کچی آبادی میں چلا گیا۔

سہار ایئرپورٹ نے جمعہ کی صبح 5 بجے ممبئی پولیس کے مرکزی کنٹرول روم کو اس کی اطلاع دی۔ اس کے بعد ساکی ناکہ پولیس کو فوری طور پر الرٹ کر دیا گیا۔ پولیس نے کال کرنے والے سے بات کی اور اس سے ڈرون کی تصاویر یا ویڈیوز لینے کو کہا۔ اس کے علاوہ پولیس نے ڈرون کی تلاش کے لیے علاقے میں سرچ آپریشن کیا۔ ڈرون خاص طور پر کچی آبادیوں میں دیکھا گیا۔ پولیس کو ڈرون کے حوالے سے فوری کارروائی کا حکم دیا گیا ہے۔ دو پولیس سب انسپکٹر اپنی ٹیم کے ساتھ علاقے کی تلاشی لے رہے ہیں۔

ساکی ناکہ کے کچھ لوگوں نے پولیس کو ڈرون جیسی چیز دیکھ کر اطلاع دی۔ لیکن جب پولیس نے تلاشی لی تو وہاں سے کچھ نہیں ملا۔ ساکی ناکہ کا علاقہ ہوائی اڈے کے قریب ہے۔ اس لیے اسے بہت حساس سمجھا جاتا ہے۔ پولیس اور سی آئی ایس ایف (سنٹرل انڈسٹریل سیکورٹی فورس) کے اہلکار ہمیشہ یہاں تعینات رہتے ہیں۔ اس نے بھی ڈرون دیکھنے سے انکار کیا ہے۔ اب بھی ممبئی پولیس معاملے کی جانچ کر رہی ہے۔ پولیس نے لوگوں سے افواہوں پر توجہ نہ دینے کی اپیل کی ہے۔

عیاں رہے کہ ہنداور پاک کشیدگی کے درمیان ممبئی کے ساحلی علاقوں میں سیکورٹی بڑھا دی گئی ہے۔ ممبئی پولیس اور انڈین کوسٹ گارڈ مشترکہ طور پر ساحلوں، بندرگاہوں، گودیوں اور سمندری راستوں پر گشت کر رہے ہیں۔ سی سی ٹی وی کیمروں اور ڈرونز کے ذریعے حساس علاقوں کی نگرانی کی جا رہی ہے۔ گشت بھی بڑھا دیا گیا ہے۔ ہندوستان اور پاکستان کے درمیان بڑھتی ہوئی کشیدگی کے پیش نظر ممبئی پولیس نے کوسٹ گارڈ کا ایک بڑا آپریشن ‘ساگر کاوچ شروع کیا ہے۔ اس مہم کے تحت سمندری گشت بڑھا دیا گیا ہے۔ ماہی گیروں سے کہا گیا ہے کہ وہ چوکس رہیں اور کشتیوں کی نقل و حرکت پر توجہ دیں۔ اس بات کو یقینی بنایا جا رہا ہے کہ کوئی بھی سمندر کے راستے شہر میں داخل نہ ہو سکے۔ اس لیے ماہی گیروں کی کشتیوں کے راستوں کی کڑی نگرانی کی جا رہی ہے۔ یہ تمام اقدامات سیکورٹی کو مدنظر رکھتے ہوئے کئے جا رہے ہیں۔

عیاں رہے کہ 26؍11 کے حملے میں دہشت گرد سمندر کے راستے ممبئی آئے تھے۔ اس لیے لوگوں سے اپیل کی گئی ہے کہ وہ الرٹ رہیں اور کسی بھی مشکوک شخص یا سرگرمی کے بارے میں فوری طور پر پولیس یا سیکورٹی ایجنسی کو اطلاع دیں۔ پولیس کا کہنا ہے کہ کسی بھی افواہ پر یقین نہ کریں۔